Kerko
Kerko

Privatësia

Të dhënat personale dhe të dhënat publike në Kerko

Cilat të dhëna në Kerko janë publike nga regjistri, nga vijnë numrat e telefonit dhe si kërkoni heqjen e një numri privat ose të emrit tuaj.

Andi B. · · 4 min lexim

Telefon i vjetër me disk, një bllok shënimesh dhe zarfe mbi një tavolinë druri
Foto: Shopify Photos / Burst (Burst license)
Në këtë faqe

Shumë njerëz na shkruajnë sepse gjejnë numrin e tyre të telefonit ose emrin e tyre në Kerko. Disa të dhëna janë publike me ligj, disa i ka publikuar vetë biznesi dhe disa janë private dhe nuk duhet të jenë aty. Këtu shpjegojmë dallimin dhe çka mund të bëni për secilën.

Çka është publike me ligj

Kerko i merr të dhënat bazë të bizneseve nga regjistri publik i Agjencisë së Regjistrimit të Bizneseve të Kosovës (ARBK):

  • emri i biznesit dhe forma juridike;
  • numri i biznesit dhe NUI-ja;
  • statusi, data e regjistrimit dhe veprimtaritë;
  • adresa e biznesit dhe komuna;
  • pronarët dhe personat e autorizuar.

Këto të dhëna janë publike sepse ligji për shoqëritë tregtare kërkon që kushdo të mund ta dijë kush qëndron pas një biznesi. Këtë e bëjnë bankat, furnitorët dhe klientët kur verifikojnë një biznes. Ndryshimet në to bëhen te ARBK-ja, jo te Kerko. Shih Ndryshimi i të dhënave në ARBK.

Kontaktet e biznesit

ARBK-ja nuk publikon numra telefoni ose email. Telefoni, emaili, webfaqja dhe orari në një profil vijnë nga:

  • webfaqja e vetë biznesit dhe faqet e tij publike në rrjete sociale;
  • burimet e hapura si OpenStreetMap dhe Overture;
  • pronari, pasi e ka verifikuar biznesin;
  • sugjerimet e përdoruesve, që ekipi ynë i shqyrton para se të shfaqen.

Të gjitha burimet janë të listuara te burimet.

Një numër që biznesi e jep për klientët është kontakt i biznesit, edhe kur është numër celulari. Nëse e keni në webfaqe, në Facebook, në tabelën e lokalit ose në fatura, klientët duhet të mund ta gjejnë. Ky numër mbetet në profil.

Kur një numër është i dhënë personale

Ligji për mbrojtjen e të dhënave personale mbron personat, jo bizneset. Një numër telefoni është e dhënë personale kur ju identifikon juve si person dhe nuk e përdorni për biznesin. Për shembull:

  • numri juaj privat, që e ka shtuar dikush tjetër;
  • numri i një punëtori që nuk punon më aty;
  • numri që e keni përdorur dikur për biznesin, por më nuk e përdorni;
  • numri që nuk ka lidhje fare me atë biznes.

Në këto raste e heqim numrin kur e kërkoni. Për ligjin vendor shihni Mbrojtja e të dhënave personale.

Si ta hiqni një numër telefoni

Nëse jeni pronar i biznesit, mënyra më e shpejtë është ta verifikoni biznesin dhe ta fshini ose ndryshoni numrin vetë nga paneli. Pas verifikimit, sugjerimet e të tjerëve nuk e mbishkruajnë atë që keni vendosur ju.

Nëse nuk jeni pronar, kërkojeni heqjen direkt nga profili:

  1. Klikoni lapsin pranë numrit.
  2. Zgjidhni Nuk duhet të jetë këtu? Kërko heqjen.
  3. Shkruani arsyen, p.sh. "Është numri im privat" ose "Nuk punoj më aty", dhe dërgojeni.

Ju duhet një llogari falas, që t'ju njoftojmë për vendimin. Nëse nuk doni llogari, na shkruani përmes formës së kontaktit me linkun e profilit, numrin dhe arsyen.

Ekipi ynë e shqyrton çdo kërkesë me dorë dhe mund t'ju kërkojë të konfirmoni se numri është juaji. Pasi të hiqet, kërkimi ynë automatik nuk e shton më atë numër në atë biznes. Nëse numri është ende në webfaqen ose rrjetet sociale të biznesit, hiqeni edhe atje, sepse të tjerët mund ta gjejnë aty.

Emri juaj si pronar ose person i autorizuar

Emrat e pronarëve vijnë nga regjistri publik. Megjithatë, nëse nuk jeni më pronar, të dhënat janë gabim ose keni arsye private, mund të kërkoni që emri juaj të mos shfaqet në Kerko. Hapat i gjeni te Qysh me kërku fshirjen e emrit tënd. Fshirja në Kerko nuk e ndryshon regjistrin zyrtar të ARBK-së.

Të drejtat tuaja

Kerko.com operohet nga KERKO Technologies, Inc. Mënyrën si i trajtojmë të dhënat personale dhe të drejtat që keni i gjeni te politika e privatësisë. Nëse nuk jeni të kënaqur me përgjigjen tonë, mund të ankoheni edhe në Agjencinë për Informim dhe Privatësi (AIP).

Pyetje të shpeshta

A është numri i telefonit i një biznesi e dhënë personale?

Varet. Numri që biznesi e jep për klientët, në webfaqe, rrjete sociale ose në tabelë, është kontakt i biznesit dhe mbetet në profil. Numri juaj privat, që nuk e përdorni për biznesin, është e dhënë personale dhe e heqim kur e kërkoni.

Nga i merr Kerko numrat e telefonit?

Nga webfaqja dhe faqet publike të vetë biznesit, nga burimet e hapura si OpenStreetMap dhe Overture, nga pronarët e verifikuar dhe nga sugjerimet e përdoruesve që ekipi ynë i shqyrton. ARBK-ja nuk publikon numra telefoni.

Si e heq një numër telefoni nga Kerko?

Nëse jeni pronar, verifikoni biznesin dhe fshijeni numrin vetë nga paneli. Përndryshe klikoni lapsin pranë numrit në profil, zgjidhni "Nuk duhet të jetë këtu? Kërko heqjen" dhe shkruani arsyen. Mund të na shkruani edhe përmes formës së kontaktit në kerko.com/kontakt.

A mund ta fshij emrin tim si pronar?

Mund ta kërkoni me butonin "Kërko fshirjen e emrit" në profilin e biznesit. Ekipi e shqyrton kërkesën dhe, nëse aprovohet, emri zëvendësohet me "I fshirë" në atë biznes.

Pse numri duket ende në Google?

Google mund ta mbajë një kopje të vjetër të faqes për disa ditë. Kur e viziton faqen sërish, e sheh versionin pa numër.

  • Privatësia
  • Profili i biznesit
Shpërndaje
Të dhënat personale dhe të dhënat publike në Kerko - Kerko